સ્તન કેન્સરના 6 સામાન્ય લક્ષણો

અમારા ગુજરાતી બોલતા ડૉક્ટર સ્તન કેન્સરનાં છ સામાન્ય લક્ષણો સમજાવે છે. જો તમને આ લક્ષણો વિશે કોઈ ચિંતા હોય, તો કૃપા કરીને તમારા આરોગ્ય વ્યાવસાયિકને મળો.

વહેલું નિદાન શા માટે મહત્વનું છે

સ્તન કેન્સર વિશ્વભરની મહિલાઓમાં બીમારી અને મૃત્યુનું એક મુખ્ય કારણ છે. વિશ્વ આરોગ્ય સંસ્થા અનુસાર, લગભગ 12 માંથી 1 મહિલાને તેમના જીવનકાળ દરમિયાન સ્તન કેન્સરનું નિદાન થશે. સદભાગ્યે, તેની સામાન્ય રીતે સારવાર થઈ શકે છે, ખાસ કરીને જો તે વહેલું પકડાય.

છ સામાન્ય લક્ષણો

  1. ગાંઠ અથવા સોજો સ્તનમાં, છાતીમાં અથવા બગલમાં. નિયમિતપણે તપાસ કરો. ગાંઠનાં બીજાં કારણો પણ હોઈ શકે છે, પરંતુ આરોગ્ય વ્યાવસાયિક પાસે તેની તપાસ કરાવો.
  2. સ્તનની ત્વચામાં ફેરફાર, જેમ કે નાના ખાડા (જે નારંગીની છાલ જેવા દેખાઈ શકે) અથવા લાલાશ. શ્યામ ત્વચા પર આ ફેરફારો જોવા વધુ મુશ્કેલ હોઈ શકે છે.
  3. કોઈ સ્પષ્ટ કારણ વિના કદ અથવા આકારમાં ફેરફાર એક અથવા બંને સ્તનોમાં.
  4. સ્તનની ડીંટડીમાંથી સ્રાવ જ્યારે તમે ગર્ભવતી ન હો અથવા સ્તનપાન ન કરાવતાં હો, ખાસ કરીને જો તેમાં લોહી હોય.
  5. સ્તનની ડીંટડીમાં ફેરફાર, જેમ કે ડીંટડી અંદરની તરફ વળી જવી અથવા ડીંટડી પર ફોલ્લીઓ.
  6. સ્તનમાં અથવા બગલમાં એવો દુખાવો જે મટતો નથી. આવતો-જતો દુખાવો સામાન્ય રીતે સ્તન કેન્સરની નિશાની નથી.

આમાંથી કોઈ એક લક્ષણ હોવાનો અર્થ એ નથી કે તમને ચોક્કસ સ્તન કેન્સર છે. પરંતુ જો તમને આમાંથી કોઈ લક્ષણ દેખાય, તો શક્ય તેટલી વહેલી તકે આરોગ્ય વ્યાવસાયિકને મળો, અને નિયમિતપણે તમારાં સ્તનોની તપાસ કરો.

આ વીડિયોનું સંપૂર્ણ લખાણ વાંચો

આ વીડિયોનું સંપૂર્ણ લખાણ છે. અમારા ડૉક્ટરોએ તે અંગ્રેજીમાં લખ્યું હતું, અને તેનો ગુજરાતીમાં અનુવાદ કરવામાં આવ્યો છે.

દુઃખની વાત છે કે સ્તન કેન્સર વિશ્વભરની મહિલાઓમાં બીમારી અને મૃત્યુનું એક મુખ્ય કારણ બની રહ્યું છે. વિશ્વ આરોગ્ય સંસ્થા અનુસાર, લગભગ 12 માંથી 1 મહિલાને તેમના જીવનકાળ દરમિયાન સ્તન કેન્સરનું નિદાન થશે. સદભાગ્યે, સ્તન કેન્સરની સામાન્ય રીતે સારવાર થઈ શકે છે, ખાસ કરીને જો તે વહેલું પકડાય. આ કારણે, આ વીડિયોમાં અમે સ્તન કેન્સરનાં 6 સામાન્ય લક્ષણો વિશે વાત કરીએ છીએ. જો તમને લાગે કે તમને આમાંથી કોઈ લક્ષણ છે, તો તેનો અર્થ એ નથી કે તમને ચોક્કસ સ્તન કેન્સર છે, પરંતુ તમારે શક્ય તેટલી વહેલી તકે તમારા આરોગ્ય વ્યાવસાયિકને મળવાનો પ્રયાસ કરવો જોઈએ.

  • પ્રથમ, તમારાં સ્તનો, છાતી અને બગલમાં ગાંઠ અથવા સોજો છે કે નહીં તે નિયમિતપણે તપાસો. ગાંઠ અને સોજો સ્તન કેન્સર સિવાયની બીજી ઘણી સ્થિતિઓને કારણે પણ થઈ શકે છે, પરંતુ આરોગ્ય વ્યાવસાયિક પાસે તેની તપાસ કરાવવી મહત્વપૂર્ણ છે.
  • બીજું, તમારાં સ્તનોની ત્વચામાં કોઈ પણ ફેરફાર પર ધ્યાન આપો. સ્તન કેન્સર સાથે સંકળાયેલા ત્વચાના બે સામાન્ય ફેરફારો છે નાના ખાડા (જે નારંગીની છાલ જેવા દેખાઈ શકે) અને લાલાશ. આ બંને ફેરફારો શ્યામ ત્વચા પર જોવા વધુ મુશ્કેલ હોઈ શકે છે.
  • ત્રીજું, એક અથવા બંને સ્તનોના કદ કે આકારમાં કોઈ સ્પષ્ટ કારણ વિના થતા ફેરફારો પ્રત્યે સજાગ રહો.
  • ચોથું, સ્તનની ડીંટડીમાંથી કોઈ સ્રાવ થાય છે કે નહીં તે તપાસો (જો તમે ગર્ભવતી ન હો અથવા સ્તનપાન ન કરાવતાં હો). ખાસ કરીને, એવા સ્રાવ પર ધ્યાન આપો જેમાં લોહી હોઈ શકે.
  • પાંચમું, તમારી ડીંટડીના આકાર કે દેખાવમાં કોઈ પણ ફેરફાર પર ધ્યાન આપો. સ્તન કેન્સરનાં બે સામાન્ય લક્ષણો છે ડીંટડી અંદરની તરફ વળી જવી અથવા ડીંટડી પર ફોલ્લીઓ થવી.
  • છઠ્ઠું, સ્તન અથવા બગલમાં એવા દુખાવાને અવગણશો નહીં જે મટતો નથી. આવતો-જતો સ્તનનો દુખાવો સામાન્ય રીતે સ્તન કેન્સરનું લક્ષણ નથી. જો કે, સતત રહેતા દુખાવા વિશે તમારા આરોગ્ય વ્યાવસાયિક સાથે વાત કરવી જોઈએ.

અમે તમને ફરીથી ખાતરી આપીએ છીએ કે આમાંથી કોઈ પણ લક્ષણ હોવાનો અર્થ એ નથી કે તમને ચોક્કસ સ્તન કેન્સર છે. અને અમે ભારપૂર્વક કહીએ છીએ કે સ્તન કેન્સરની મોટા ભાગે સારવાર થઈ શકે છે, ખાસ કરીને જો તે વહેલું પકડાય. આ કારણે, અમે તમને નિયમિતપણે તમારાં સ્તનોની તપાસ કરવા અને કોઈ પણ ચિંતા વિશે તમારા આરોગ્ય વ્યાવસાયિક સાથે વાત કરવા પ્રોત્સાહિત કરીએ છીએ.

અંતે, અમે આ વીડિયો 18 જુદી જુદી ભાષાઓમાં બનાવી રહ્યા છીએ અને તે developingmedicine.org પર અને અમારાં સોશિયલ મીડિયા પર મફત ઉપલબ્ધ થશે, તેથી કૃપા કરીને તેને મિત્રો અને પરિવાર સાથે શેર કરો. આભાર.

મહત્વપૂર્ણ: આ માહિતી સામાન્ય જાગૃતિ માટે છે. તે આરોગ્ય વ્યાવસાયિકની સલાહનું સ્થાન લેતી નથી. જો તમને તમારા સ્વાસ્થ્યની ચિંતા હોય, અથવા તમારાં લક્ષણો વધુ ખરાબ થાય, તો આરોગ્ય વ્યાવસાયિકને મળો. કટોકટીમાં, તરત જ નજીકના આરોગ્ય કેન્દ્ર પર જાઓ.

આ માહિતી વિશે

અમારા ડૉક્ટરો દરેક સંસાધન લખે છે અને તેની સમીક્ષા કરે છે. અમે અમારાં સંસાધનો કેવી રીતે બનાવીએ છીએ

જો તમને કોઈ ભૂલ દેખાય, તો કૃપા કરીને અમને ઇમેઇલ કરો: doctors@developingmedicine.org

ગુજરાતીમાં અમારી તમામ આરોગ્ય માહિતી